Tanrıların şeiri

Məni himayənə al, Artemida
İnsan olmaq yorur məni
Qarışqa olsaydım,
Çiyinlərimdəki yükü
Ruzi bilər,
Sevə-sevə daşıyardım.

Kəpənək olsaydım,
İntiharı düşünməzdim
Uça-uça yaşayardım.
Hörümçək olsaydım,
"Xərçəng"-lərin saçlarını hörərdim

Quş olsaydım,
Haralısan deyənlərə gülərdim
Donuz olsaydım,
Vegeterianları ayrıca,
Yəhudilərlə müsəlmanları
Bir arada sevərdim

Oxunu heyvanlara tuşla, Eros
İnsanlar seviləsi hər şeyi sevib