Ayris Merdokun naməlum rəsm əsərləri Oksfordda tapıldı

Paranoyya.com saytı BBC-ə istinadən xəbər verir ki, Böyük Britaniyanın məşhur yazıçısı, Buker mükafatı laureatı Ayris Merdokun indiyədək ictimaiyyətə məlum olmayan rəsm kolleksiyası aşkar edilib. On ildən artıqdır ki, yazıçının yaradıcılığını tədqiq edən Maylz Lisona ötən il Oksforddakı evlərdən birində naməlum əsərlərin tapılması barədə məlumat daxil olub.

Tədqiqatçı Oksfordda yerləşən evin tozlu çardağına qalxarkən gözlənilməz mənzərə ilə qarşılaşıb. Burada onilliklər boyu toxunulmaz qalan 80-ə yaxın rəsm və eskizdən ibarət xəzinə aşkarlanıb. Merdok 1940-cı illərin əvvəllərində, tələbəlik illərində yaşadığı bu evdə yaradıcılığının bir hissəsini gizli saxlayıb.

Lisonun sözlərinə görə, həmin məkana daxil olmaq sanki zaman səyahətinə çıxmaq kimi idi. Toz və hörümçək torları içində tapılan materiallar olduğu kimi qorunub saxlanılıb və heç bir restavrasiya işi aparılmadan ictimaiyyətə təqdim olunub. Kolleksiyanın ən diqqətçəkən nümunəsi isə yazıçının özünün çəkdiyi yeganə avtoportretdir.

Sərgilənən əsərlər arasında Salvador Dali və Pol Neş kimi sürrealist rəssamların təsiri ilə yaradılmış tablolar, həmçinin Avropada müharibə təhlükəsinin hökm sürdüyü dövrün ab-havasını əks etdirən işlər yer alır. Bu kolleksiya yazıçının şəxsiyyətini və yaradıcılıq dünyasını yeni bir prizmadan görməyə imkan verir.

Hazırda bu nadir əsərlər Çiçester Universitetinin kitabxanasında nümayiş olunur. Dekabr ayına qədər davam edəcək pulsuz sərgidən sonra rəsmlərin Oksforda və ya ölkənin milli muzeylərindən birinə qaytarılması nəzərdə tutulur.