Bredli Teylor Birminqemin yeni laureat şairi seçildi

Paranoyya.com saytı BBC-ə istinadən xəbər verir ki, Birminqemin yeni laureat şairinin adı məlum olub. Bu fəxri ada festivallarda və müxtəlif tədbirlərdə birbaşa tamaşaçıların qarşısında bədahətən şeirlər yazmaqla tanınan 28 yaşlı Bredli Teylor layiq görülüb. İki il müddətinə bu vəzifəni icra edəcək gənc şair qərarı böyük sevinclə qarşılayıb və bunun ona sevdiyi şəhəri daha ucadan tərənnüm etmək imkanı verəcəyini bildirib.

Məşhur "Peaky Blinders" serialının yaradıcısı Stiven Nayt üçün də xüsusi şeir qələmə alan Teylor parklarda və mədəniyyət hadisələrində dərhal şeir yazmaq bacarığı ilə məşhurluq qazanıb. O, Birminqemin zəngin ədəbi irsinə toxunaraq, incəsənətlə məşğul olmağın getdikcə çətinləşdiyi bir dövrdə bu statusun şəhərin mədəniyyətini qorumaq baxımından çox əhəmiyyətli olduğunu vurğulayıb. Şair şəhərin Benjamin Zefaniya, Keysi Beyli kimi yazarları, eləcə də Ozzi Osborn və Rubi Törner kimi musiqiçiləri ilə tanındığını xatırladıb.

Yeni laureat fəaliyyəti dövründə müxtəlif tədbirlər təşkil etməyi, mərhum şair Benjamin Zefaniyanın xatirəsinə həsr olunmuş layihəni genişləndirməyi və yerli təşəbbüslərə dəstək verməyi planlaşdırır. O, həmçinin ikiillik fəaliyyəti çərçivəsində yazı makinası ilə şəhərin müxtəlif yerlərində bədahətən şeir yazmaq ənənəsini davam etdirəcəyini, Birminqem kitabxanaları ilə əməkdaşlıq edəcəyini və ölkə daxilində iki böyük qastrol səfərinə çıxacağını qeyd edib.

Bredli Teylor bədahətən şeir yazmaq fəaliyyətinə 2021-ci ildə başlayıb. O, indiyədək məşhur "Hay" və "Verve" poeziya festivallarında, eləcə də bu yaxınlarda keçirilən Beynəlxalq Birminqem Günündə çıxış edib. Şairin "Peaky Blinders" serialına həsr etdiyi "Xalqın əmri ilə" adlı şeiri bu ilin mart ayında filmin premerasından əvvəl səsləndirilərək böyük maraqla qarşılanıb.