Ceffri Arçer son kitabının təqdimatı ərəfəsində təhsil aldığı məktəbi ziyarət edib

Paranoyya.com saytı BBC-ə istinadən xəbər verir ki, Dünyaşöhrətli yazıçı Ceffri Arçer yaradıcılıq fəaliyyətinə son qoyacaq yeni romanının nəşri ərəfəsində vaxtilə təhsil aldığı Wellington məktəbinə baş çəkib. Hazırda 86 yaşı olan müəllif yarıməsrlik karyerası ərzində "Keyn və Abel", "Klifton xronikaları" kimi məşhur əsərlər də daxil olmaqla, ümumilikdə 300 milyondan çox kitab satıb. O, romanlarının süjetini tez-tez doğulub boya-başa çatdığı Somerset qraflığının Wellington şəhərində cərəyan etdirir.

Yazıçı yaxın günlərdə işıq üzü görəcək "Adəm və Həvva" adlı son kitabının çapından əvvəl Wellington məktəbinin kitabxanasını ziyarət edib. Keçmiş məktəbinə qayıtmaqdan böyük həyəcan duyduğunu bildirən Arçer, kitabxanaya tərəf gedərkən gənc oğlan və qızları görüb gələcək nəsillər haqqında düşündüyünü vurğulayıb. O, ailəsinin maddi imkanı olmadığı üçün bu məktəbdə təqaüdlə oxuduğunu və bu səbəbdən təhsil ocağının onun üçün xüsusi əhəmiyyət kəsb etdiyini, burada çox xoş xatirələrinin qaldığını qeyd edib.

Məktəbin inkişaf şöbəsinin əməkdaşı Culiyet Hendli yazıçının hələ də böyük enerji və həvəslə çalışdığını bildirib. Onun sözlərinə görə, Arçer məktəb illərində həm də istedadlı gimnast olub və məktəbin təbilçilər dəstəsində ifa edib. Hendli qeyd edib ki, məktəb məzunları hər zaman bu təhsil ocağının onlara gələcək peşə seçimlərində, o cümlədən Arçerin dünyaşöhrətli yazıçı olmasında böyük ilham verdiyini vurğulayırlar. O, həmçinin əlavə edib ki, belə böyük uğur qazanmaq üçün işinə qarşı sonsuz sevgi olmalıdır, çünki Arçer çap olunacaq son kitabının hər bir variantını əllə yazıb və ümumilikdə 18 qaralama hazırlayıb.

Yazıçının son əsəri olan "Adəm və Həvva" romanı gənc bir cütlüyün sevgi hekayəsindən bəhs edir. Hadisələr Hitlerin Britaniyanı işğal edib-etməmək tərəddüdləri fonunda cərəyan edir. Arçer bildirib ki, oxucunu bu iki gəncin dünya tarixini dəyişdiyinə inandırmaq üçün əsəri çox axıcı dillə yazmalı olub. 1940-cı ildə doğulduğunu xatırladan müəllif uşaqlığının ilk beş ilinin müharibə dövrünə təsadüf etdiyini və o zaman fiziki məhdudiyyətli insanları görməyin onun üçün adi hal olduğunu qeyd edib.

Yaradıcılığına niyə məhz bu kitabla son qoyduğu barədə suala cavab verən yazıçı bildirib ki, hər kəs Olimpiadada son 100 metrlik məsafəni qaçıb qızıl medal qazanmaq istəyər. O, həyatda ən böyük bacarığın vaxtında getməyi bacarmaq olduğunu vurğulayıb.