Şotlandiyalı yazıçı Piter Mey vəfat edib

Paranoyya.com saytı BBC-ə istinadən xəbər verir ki, Şotlandiyanın ən məhsuldar detektiv janrı yazıçılarından və televiziya ssenaristlərindən biri olan Piter Mey 74 yaşında dünyasını dəyişib. Yazıçının həyat yoldaşı və həmkarı Cenis Halli onun vəfatı ilə bağlı kədərini ifadə edəcək söz tapmaqda çətinlik çəkdiyini bildirib. Mey uzun illərdir yaşadığı Fransanın cənubundakı evində vəfat edib.

Dünya miqyasında 15 milyona yaxın tirajla satılan kitabların müəllifi olan yazıçının sonuncu əsəri hesab etdiyi "Island of the Dead" romanının 2027-ci ilin yanvarında oxuculara çatdırılması planlaşdırılır. Nəşriyyatçısı və yaxın dostu Con Rayli bildirib ki, Mey təqaüdə çıxmağa hazırlaşsa da, yaradıcılığının son mərhələsində daha bir əsər yazmağa qərar vermişdi. Yazıçı yanvar ayında kitabının nəşri ilə paralel olaraq Şotlandiya və Lyuis adasına vida turu keçirməyi planlaşdırırdı.

Qlazqoda anadan olan Piter Mey karyerasına jurnalist kimi başlayıb və 21 yaşında "İlin gənc jurnalisti" mükafatına layiq görülüb. 1976-cı ildə ilk romanı "The Reporter" işıq üzü gördükdən sonra o, televiziya sahəsinə keçid edib. "Take the High Road" və "Machair" kimi populyar seriallarda ssenarist və prodüser kimi uğurlu işlərə imza atıb.

Yazıçının şöhrət qazanan "Lewis Trilogy" silsiləsinin ilk kitabı olan "The Blackhouse" 2009-cu ildə fransız, 2011-ci ildə isə ingilis dilində nəşr edilib. Bu əsər 2011-ci ildə Fransada avropalı müəlliflərin ən yaxşı romanı kimi "Cezam Prix Littéraire Inter CE" mükafatına layiq görülüb.

Şotlandiyanın birinci naziri Con Suinni yazıçının vəfatından kədərləndiyini bildirib. O, Meyin Hebrid adalarında cərəyan edən hadisələri təsvir edərkən istifadə etdiyi ifadəli üslubun və təbiət mənzərələrinin heyranedici olduğunu vurğulayıb. Con Rayli isə mərhum yazıçının təkcə yaradıcılığı ilə deyil, həm də xeyirxahlığı, səxavəti və həyata olan bağlılığı ilə oxucuların və həmkarlarının böyük rəğbətini qazandığını qeyd edib.