Dünyanın ən böyük üzən kitab sərgisi Belfast limanına lövbər salıb

Paranoyya.com saytı BBC-ə istinadən xəbər verir ki, Dünyanın ən böyük üzən kitab sərgisi sayılan "Logos Hope" gəmisi Şimali İrlandiyanın Belfast limanına gəlib. Beynəlxalq heyətlə idarə olunan və könüllülük prinsipi ilə fəaliyyət göstərən bu gəmidə xristian dəyərlərini təbliğ edən, həmçinin müxtəlif mövzularda 5 mindən çox kitabın təqdim olunduğu böyük bir kitab mağazası fəaliyyət göstərir. Albert dokunda dayanan gəminin rəsmi açılışını Belfastın lord-meri Rois-Maire Donelli edib. Sərgi oktyabrın 20-nə qədər ziyarətçilər üçün açıq olacaq.

Gəminin rəhbəri Doron Lukat bildirib ki, Böyük Britaniya və Avropa səyahətləri zamanı Belfast heyətin baş çəkmək istədiyi ilk ünvanlardan biridir. Onun sözlərinə görə, Şimali İrlandiya ilə uzunmüddətli dostluq əlaqələri mövcuddur və illər ərzində bu bölgədən olan bir çox könüllü gəmidə fəaliyyət göstərib. Lukat qeyd edib ki, gəminin əsas məqsədi insanlarla bilik, yardım və ümid hissini bölüşməkdir. O, gələn qonaqların buradakı kitablarla tanış olub, heyətlə ünsiyyət qurduqdan sonra öz icmalarına ümid və birlik mesajı aparacaqlarına inanır.

Gəminin fəaliyyətini təşkil edən "GBA Ships" xristian təşkilatının əməkdaşı, Tayron qraflığından olan Hanna Qoudi Şimali İrlandiyaya qayıtmağın onun üçün böyük əhəmiyyət kəsb etdiyini vurğulayıb. İlk dəfə 2004-cü ildə Londonderridə bu gəmilərdən birini ziyarət etdiyini deyən Qoudi, illər sonra burada heyət üzvü kimi çalışacağını heç vaxt xəyal etmədiyini bildirib. O, bu layihənin Şimali İrlandiya insanlarını birləşdirmək və keçmiş könüllülərlə yenidən əlaqə yaratmaq üçün gözəl bir fürsət olduğunu qeyd edib.

Şimali İrlandiyanın təhsil naziri Pol Givan da gəminin yenidən Belfasta gəlişindən məmnunluğunu ifadə edib. Nazir bildirib ki, bu layihə şəhərə böyük canlanma gətirəcək. Təhsil naziri kimi savadlılığın artırılmasına xüsusi önəm verdiyini deyən Givan, insanların bu nəhəng üzən kitab mağazasını ziyarət etmələrinin vacibliyini vurğulayıb. O, gəminin təkcə Belfasta deyil, bütün dünyaya ümid mesajı yaydığını əlavə edib.