Ben Makintayrın nüvə müharibəsinin qarşısını alan agentdən bəhs edən kitabı Waterstones mükafatına namizəd göstərilib

Paranoyya.com saytı BBC-ə istinadən xəbər verir ki, Oksfordda doğulmuş tanınmış yazıçı və tarixçi Ben Makintayrın "Redwood" adlı son soyuq müharibə trilleri "Waterstones 2026" İlin Kitabı mükafatının qısa siyahısına daxil edilib. Bestseller müəllifi olan Makintayr bu əsərində ilk dəfə işıq üzü görən materiallardan istifadə edərək bəlkə də nüvə fəlakətinin qarşısını almış "naməlum cəsus"un həyatından bəhs edir.

Məpfi kod adı "Redwood" olan şəxs əslində İranda məskunlaşmış Sovet kəşfiyyat zabiti Vladimir Kuzıçkindir. O, Böyük Britaniyanın "MI6" kəşfiyyat xidmətinə işləməyə razılıq verərək ölkəsinin sirlərini britaniyalılara ötürüb. Müəllifin sözlərinə görə, agenti bu addımı atmağa sövq edən səbəb onun şəxsi həyatı ilə bağlı gizlinləri olub. Həmin sirrin açılacağı təqdirdə həyatı alt-üst olacaq agent yeganə çıxış yolunu "KGB" sirləri müqabilində Britaniya kəşfiyyatına sığınmaqda görüb.

Kuzıçkinin ötürdüyü məlumatlar Sovet İttifaqının İranı ələ keçirmək planını ifşa edib. Plana əsasən, Kommunist Partiyası "KGB"nin dəstəyi ilə dövlət çevrilişi etməli, ardından Qırmızı Ordu ölkəyə daxil olmalı idi. Makintayr bildirir ki, bu plan baş tutsaydı, ABŞ regionda kifayət qədər canlı qüvvə və ənənəvi silaha sahib olmadığı üçün mütləq nüvə silahından istifadə edəcəkdi. Lakin bu müdaxilənin qarşısının alınması həm də İran rejimini möhkəmləndirib ki, bu da gözlənilməz nəticələrdən xəbər verir.

Müəllif kitabın müasir dövrlə böyük səsləşdiyini vurğulayır. Əsərdəki əsas personajlardan bəziləri keçən ilin fevralında İsrailin hava zərbələri zamanı həlak olub. Məşhur amerikalı yazıçı Con Qrişem də Yaxın Şərqdəki mövcud vəziyyəti nəzərə alaraq, bu kitabı Makintayrın yaradıcılığında "ən vaxtında yazılmış əsər" adlandırıb.

Oksfordda tarix ruhlu bir evdə böyüdüyünü və Kembricdə təhsil aldığını bildirən Makintayr cəsusluq aləmində həqiqətin hər zaman uydurmadan daha təəccüblü olduğunu deyir. O, kitabının mükafata namizədlər arasında yer almasından məmnunluğunu ifadə edib. Mükafatın qalibi noyabrın 26-da elan olunacaq.