Mütaliə birmingemli yazıçı Kit de Vaalı necə psixi böhrandan xilas etdi

Paranoyya.com saytı BBC-ə istinadən xəbər verir ki, Beynəlxalq səviyyədə tanınan britaniyalı yazıçı Kit de Vaal BBC-yə müsahibəsində gənclik illərində yaşadığı ağır çətinliklərdən və kitabların onun həyatını necə dəyişməsindən danışıb. Birmingemdə irland ananın və karib mənşəli atanın ailəsində böyüyən yazıçı uşaqlığının yoxsulluq, irqçilik və təcrid olunma hissi ilə keçdiyini bildirib. Onun sözlərinə görə, məhz bu acı təcrübələr və eyni zamanda rastlaşdığı insanlıq nümunələri sonralar yaradıcılığının əsas mövzusuna çevrilib.

Ailəsinin daxil olduğu dini icmanın qaydaları ilə yaşamaq istəməyən de Vaal 16 yaşında evi tərk edib. Həmin dövrdə zərərli vərdişlərə qurşanan və alkoqol asılılığından əziyyət çəkən gənc qız yaxın dostlarının aşırı doza səbəbindən vəfat etməsindən sonra həyatını dəyişmək haqqında düşünməyə başlayıb. Lakin 21 yaşına çatanda onun ruhi vəziyyəti kəskin pisləşib və o, dərin psixi böhranın bir addımlığına qədər geriləyib.

Həyatındakı dönüm nöqtəsi dövlət prokurorluğu xidmətində işə düzəldikdən sonra baş verib. Yuxusuzluqdan əziyyət çəkən de Vaala hüquqşünas həmkarlarından biri mütaliə ilə məşğul olmağı məsləhət görüb və ona "Hərb və sülh", "Madam Bovari" kimi klassik əsərlərdən ibarət 10 kitablıq siyahı təqdim edib. O vaxta qədər mütaliə vərdişi olmayan və kitabları sevməyən de Vaal bu tövsiyə ilə xəyal dünyasını və mütaliənin gücünü kəşf edərək həyatını tamamilə yenidən qurub.

Mütaliə həvəsi zamanla onu öz əsərlərini yazmağa sövq edib. On ildən çox davam edən uğursuz cəhdlərdən və yazıçı ustalıqlarına yiyələndikdən sonra o, böyük uğur qazanıb. Müəllifə beynəlxalq şöhrət gətirən "Mənim adım Leondur" (My Name Is Leon) romanı 1980-ci illərin Birmingemində uşaq evində böyüyən balaca bir oğlanın həyatından bəhs edir. Əsər sonradan BBC tərəfindən ekranlaşdırılıb.

Hazırda Böyük Britaniyanın ən məşhur yazıçılarından biri olan Kit de Vaal mütaliənin bütün formalarını təbliğ etməyə davam edir. Həyatını kitablar vasitəsilə xilas etdiyini bildirən müəllif gənc yazarlara yalnız həqiqətən önəm verdikləri mövzular haqqında yazmağı tövsiyə edir.