Lottie Brooks" seriyasının müəllifi Keyti Kirbi 3 milyonluq satış uğurundan danışıb

Paranoyya.com saytı BBC-ə istinadən xəbər verir ki, Böyük Britaniyanın Houv şəhərindən olan məşhur uşaq yazıçısı Keyti Kirbi "Lottie Brooks" kitab seriyasının qazandığı böyük uğurdan məmnunluğunu ifadə edib. Beş il ərzində əsərləri üç milyon nüsxə ilə satılan müəllif bu kitabları yazmağın onun üçün böyük zövq olduğunu bildirib.

Artıq seriyanın "Lottie Brooks's Twelve Disasters of Christmas" adlı onuncu kitabı oxuculara təqdim olunub. Kitablarına illüstrasiyaları da özü çəkən Kirbi bildirib ki, insanların Lotinin həyatı haqqında oxumağı sevməsi və bunun onun əsas işinə çevrilməsi minnətdarlıq hissidir.

Müəllifin sözlərinə görə, əsas qəhrəman Loti təбиi ki, yöndəmsiz, xaotik və davamlı olaraq müxtəlif çətinliklərlə üzləşən bir obrazdır. O, böyümək, yeni məktəbə getmək və həddi-büluğ dövrünü keçmək kimi hər kəsin yaşadığı proseslərdən keçən adi bir qızdır. Kitablarda onun bütün bu maneələri necə dəf etməsi və daha yaxşı insan olmağa çalışması təsvir edilsə də, əhvalatlar mahiyyətcə xoşbəxt sonluqla bitir.

Əvvəllər reklam sahəsində çalışan Keyti Kirbi yazıçılığa körpə uşağı olarkən blog aparmaqla başlayıb. Bu fəaliyyət əvvəlcə böyüklər üçün üç kitabın ərsəyə gəlməsinə səbəb olub. Daha sonra isə ətrafındakılar onun yumor hissinin uşaq ədəbiyyatı üçün çox uyğun olduğunu bildiriblər. Yazıçı ilk Loti kitabını məhz özünün həmin yaşlarda oxumaq istədiyi tərzdə qələmə aldığını və hər kəsin bu obrazda özündən bir parça tapdığını vurğulayıb.

Qeyd edək ki, seriyanın yeni işıq üzü görən sonuncu kitabı gündəlik formatında deyil, qısa hekayələr toplusu şəklində yazılıb.