Britaniyalı yazıçının hekayəsi Hollivudun ulduz heyətli yeni filminə ilham verib

Paranoyya.com saytı BBC-ə istinadən xəbər verir ki, Glosterşir qraflığının Stroud şəhərində yaşayan yazıçı Ursula Uillsin camping səfəri zamanı qamışdan düzəldilmiş heykəllərdən təsirlənərək qələmə aldığı qısa hekayə Hollivudun böyük ekran əsərinə çevrilib. Müəllifin 2006-cı ildə Kornuol istirahətindən qayıtdıqdan sonra yazdığı "The Wicker Husband" adlı 14 səhifəlik hekayə cəmiyyətdən təcrid olunmuş balıqçı qadının özünə həyat yoldaşı toxutdurmaq üçün səbət ustasına müraciət etməsindən bəhs edir. Həmin əsər əsasında çəkilən və böyük maraqla gözlənilən "Wicker" filmində əsas rolları Oliviya Kolman, Aleksandr Skarsqard və Piter Dinkleyc kimi məşhur aktyorlar paylaşırlar.

Yazıçı hekayə ideyasının Melinsey Mill adlanan köhnə su dəyirmanı ərazisindəki qamış heykəllər cığırını gəzərkən yarandığını bildirib. O, hazırladığı mətni "East of the Web" hekayə saytında yerləşdirib və əsər tezliklə böyük oxucu kütləsinin diqqətini cəlb edib. Hekayənin motivləri əsasında əvvəlcə müzikl hazırlanıb və 2020-ci ilin martında Nyuboridəki "Watermill Theatre" səhnəsində nümayiş olunub. Lakin koronavirus pandemiyası səbəbindən tamaşa cəmi dörd seansdan sonra dayandırılıb. Bir il sonra isə prodüser Castin Lotrop hekayənin ekranlaşdırma hüquqlarını almaq üçün müəllifə müraciət edib.

Ekran əsərinin çəkiliş prosesi 2023-cü ildə Oliviya Kolmanın layihəyə qoşulması ilə sürətlənib və 2024-cü ilin sonlarında Budapeştdə reallaşdırılıb. Filmin rejissorları və ssenari müəllifləri Aleks Hyuston Fişer ilə Eleonor Vilson hekayəni ilk oxunuşdan bəyəndiklərini, bu sadə təmsildə seks, nikah və qeyri-adi sevgiyə dair satirik komediya potensialı gördüklərini vurğulayıblar. Onlar böyük ekran üçün mətni bir qədər canlandıraraq balıqçı qadınla qamışdan olan yoldaşı arasındakı münasibətləri daha qabarıq təqdim ediblər.

Oktyabrın 30-da Böyük Britaniya kinoteatrlarında nümayişə girən romantik fantastika və komediya janrlı film artıq sosial şəbəkələrdə geniş müzakirələrə səbəb olub. Ekran əsərinin Britaniya premyerası bu ayın əvvəlində Londonda, Britaniya Film İnstitutunda baş tutub. Çəkiliş meydançasını da ziyarət edən Ursula Uills nəticədən çox məmnun qaldığını və tamaşaçıların bu filmi böyük coşğu ilə qarşılayacağını bildirib.

2004-cü ildə "Bath Spa" Universitetində magistr dərəcəsi alan və uzun illər Blistolda yaşayan yazıçının hazırda ədəbi agenti var. Müəllifin 13 qısa hekayədən ibarət yeni kitabı gələn ilin aprel ayında işıq üzü görəcək. Yazıçı Hollivudun məşhur ulduzlarının yer aldığı bu layihənin onun üçün gözlənilməz, lakin həyəcanverici bir təcrübə olduğunu və əsərinin uğurlu yolçuluğunun hələ dəki davam etdiyini diqqətə çatdırıb.