Helen Fildinq “Bricit Consun gündəliyi” üslubunda yeni yumor mükafatı təsis edib

Paranoyya.com saytı BBC-ə istinadən xəbər verir ki, Məşhur “Bricit Consun gündəliyi” romanının müəllifi Helen Fildinq İngiltərənin şimalından olan komik gündəlik yazarlarını aşkar etmək məqsədilə yeni ədəbi mükafat təsis edib. Qərbi Yorkşirdə doğulan yazıçı bu addımı Böyük Britaniyada yazarlar üçün imkanların qeyri-bərabər paylanması ilə əsaslandırıb. Onun sözlərinə görə, ölkənin cənubunda imkanlar şimala nisbətən daha çoxdur.

“Bricit Cons mükafatı” adlanan bu layihə “New Writing North” xeyriyyə təşkilatı ilə əməkdaşlıq çərçivəsində həyata keçirilir. Müsabiqə İngiltərənin şimalında yaşayan, hələ əsəri çap olunmamış və ədəbi agenti olmayan müəlliflər üçün nəzərdə tutulub. Qalib gəlmək üçün namizədlər birinci şəxsin dilindən yazılmış 1000 sözdən ibarət ən məzəli mətni təqdim etməlidirlər.

İlk mərhələdə 2027-2029-cu illəri əhatə edəcək mükafatın qalibi 2 000 funt-sterlinq pul mükafatı qazanacaq. Bundan əlavə, qalibə Helen Fildinqin ədəbi agentləri və “New Writing North” təşkilatı tərəfindən geniş yaradıcılıq dəstəyi paketi təqdim olunacaq. Əsərlərin qəbulu 2026-cı il noyabrın 23-dən 2027-ci il fevralın 1-dək davam edəcək. Qalibin adı gələn yay Nyu-Kasl şəhərində keçiriləcək mərasimdə açıqlanacaq və mükafatı şəxsən Fildinq özü təqdim edəcək.

Helen Fildinq bildirib ki, Bricit Cons obrazının yumoristik ruhu məhz Yorkşirdə böyüyərkən ətrafındakı insanların gündəlik zarafatlarından və səmimiyyətindən qaynaqlanır. Yazıçı bu mükafatın məşhur komiklər üçün deyil, sadə həyat sürən və təbii yumor hissəsinə malik tanınmayan yazarlar üçün bir şans olduğunu vurğulayıb.

Qeyd edək ki, Bricit Consun gündəliyi ilk dəfə 1995-ci ildə “Independent” qəzetində rubrika kimi dərc olunub, 1996-cı ildə isə beynəlxalq bestsellerə çevrilən kitaba çevrilib. Reni Zellvegerin baş rolda oynadığı ekranlaşdırma və davam romanları obrazı dünya şöhrətli edib. “New Writing North” təşkilatının nümayəndəsi Uill Makki bu təşəbbüsü yüksək qiymətləndirərək, bunun onların mükafatları tarixində sırf komediya janrına həsr olunmuş ilk mükafat olduğunu diqqətə çatdırıb.