Kornuolldakı xeyriyyə mağazasında tapılan nadir "Narniya" kitabı 1000 funt-sterlinqə satılıb

Paranoyya.com saytı BBC-ə istinadən xəbər verir ki, Böyük Britaniyanın Kornuoll qraflığında yerləşən Truro şəhərindəki "Oxfam" xeyriyyə kitab mağazasında K.S. Lyuisin məşhur "Narniya salnamələri" silsiləsindən olan "Şir, cadugər və paltar şkafı" əsərinin 1950-ci ilə aid nadir ilk nəşri tapılıb. Mağazanın diqqətli könüllüsü tərəfindən aşkarlanan uşaq fentezi romani təşkilatın onlayn satış portalına yerləşdirildikdən dərhal sonra 1000 funt-sterlinqə satılıb.

Kitabı tamamilə təsadüfən yeni bağışlanan ədəbiyyatların arasından tapan Ceyn Rikard adlı könüllü, nəşrin üz qabığının köhnəliyini görüb içini yoxlamaq qərarına gəldiyini bildirib. O, kitabın təkrar nəşr olmadığını anladıqdan sonra internetdə ilk nəşrlərin əlamətlərini axtarıb və əlindəki nüsxənin məhz həmin qiymətli variant olduğunu dəqiqləşdirib. Rikard mağazaya tez-tez 30-50 funtluq kitabların bağışlandığını, lakin 1000 funt dəyərində belə bir tapıntının ilk dəfə baş verdiyini vurğulayıb.

Obyektin müdiri Barnabi Attuell dəyərli kitabın satışa çıxarılması prosesinin kollektiv əmək sayəsində baş tutduğunu qeyd edib. Könüllülərdən biri kitabın təsvirini yazdıqdan və fotoları çəkildikdən sonra məhsul sayta yerləşdirilib. Attuell toz qabığı (üst cildi) olmasa belə, ilk nəşrin bu qiymətə satılmasının böyük uğur olduğunu və əldə olunan gəlirin ehtiyacı olan insanlara kömək üçün sərf ediləcəyini bildirib. Mağaza müdiri bu diqqətinə görə könüllü Ceyn Rikarda xüsusi təşəkkür edib.

Qeyd edək ki, K.S. Lyuis tərəfindən 1950-1956-cı illər arasında qələmə alınan və yeddi romandan ibarət olan "Narniya salnamələri" silsiləsi dünya ədəbiyyatının ən tanınmış uşaq əsərlərindəndir. Defalərlə teatr və kinosəhnələrinə uyğunlaşdırılan silsilənin ən məşhur hissəsi sayılan "Şir, cadugər və paltar şkafı" son olaraq "Netflix" tərəfindən ekranlaşdırılıb.