Uşaq yazarları Sally Rooney-yə dəstək üçün qonorarlarını ona bağışlayırlar

Paranoyya.com saytı BBC-ə istinadən xəbər verir ki, Uels və İrlandiyanın uşaq ədəbiyyatı laureatları kitab satışından əldə etdikləri qonorarları məşhur yazar Sally Rooney-yə bağışlamaq qərarına gəliblər. Birləşmiş Krallıq hökumətinin "Palestine Action" təşkilatını terrorçu qruplaşmalar siyahısına salmasından sonra Rooney-nin bu quruma maliyyə dəstəyini davam etdirmək niyyəti hüquqi problemlər yaradıb. Böyük Britaniyada kitablarının satışının cinayət məsuliyyəti doğura biləcəyindən ehtiyat edən yazar orada romanlarının tədarükünü dayandırıb.

Uelsin uşaq ədəbiyyatı laureatı Nicola Davies "The Day War Came" kitabından gələn qonorarı Rooney-yə göndərəcəyini bəyan edib. İrlandiyalı həmkarı Chris Haughton da analoji addım ataraq Britaniyadakı satış gəlirlərini yazara verəcəyini bildirib. Qərarını həmrəylik addımı kimi qiymətləndirən Davies birbaşa qadağan olunmuş təşkilata deyil, Rooney-yə iyanə etdiyini və Britaniya qanunlarını pozmadığını vurğulayıb. O, Qəzzada minlərlə uşağın həlak olduğu bir vaxtda bu fəlakətə laqeyd qala bilməyəcəyini qeyd edib.

Böyük Britaniya hökuməti "Palestine Action" qrupunu mülkiyyətə ciddi ziyan vurmaqda və terror əməllərində təqsirləndirərək qadağan olunmuş təşkilatlar siyahısına daxil edib. Ölkənin Daxili İşlər Nazirliyi xatırladıb ki, qadağan olunmuş qurumlara hər hansı maliyyə dəstəyi göstərmək qanunla cinayət hesab olunur. Bununla belə, hökumət fələstinlilərə dəstək məqsədilə keçirilən qanuni etiraz aksiyalarına hər hansı məhdudiyyət qoyulmadığını bildirib.

Gənc yaşında böyük şöhrət qazanan Sally Rooney "Normal People", "Conversations With Friends" və "Intermezzo" kimi bestseller əsərlərin müəllifidir. Bütün dünyada altı milyondan çox kitabı satılan yazar əqidəsinə görə atdığı bu addımın hüquqi nəticələrini qəbul etməyə tam hazır olduğunu bəyan edib. Hazırda Böyük Britaniyadakı kitab mağazalarında onun əsərlərinin ehtiyatda olan nüsxələri satılsa da, elektron kitabların satışı artıq dayandırılıb.