Qruffalo obrazının yaradıcısı uğurun sirrini bölüşüb

Paranoyya.com saytı BBC-ə istinadən xəbər verir ki, Dünyaca məşhur Qruffalo kitablar seriyasının illüstratoru Aksel Şeffler əsərlərinin qazandığı qlobal uğurun ona hələ də inanılmaz göründüyünü etiraf edib. Yazıçı Culiya Donaldson ilə 90-cı illərin əvvəllərindən əməkdaşlıq edən rəssam, bu həftəsonu Hastings Hekayə Festivalında iştirak edəcək. Festivalın hamisi olan Şeffler tədbir çərçivəsində oxucularla görüşəcək, canlı rəsmlər çəkəcək və kitablarını imzalayacaq.

1999-cu ildən bəri 18,2 milyondan çox tirajla satılan Qruffalo obrazının yaradılma prosesindən danışan 68 yaşlı rəssam, personajın adının ona camış (buffalo) sözünü xatırlatdığını bildirib. Məhz bu bənzərlikdən ilhamlanaraq obrazı buynuzlu, quyruqlu və tüklü şəkildə təsvir etməyə qərar verib. Rəssamın sözlərinə görə, nəşriyyatın tələbi ilə obrazı daha az qorxulu hala gətirmək üçün 15-ə yaxın fərqli variant üzərində işləyib. Lakin o, məktəblilərlə görüşlərdə uşaqların daha qorxulu variantlara üstünlük verdiyini müşahidə etdiyini vurğulayıb.

Şeffler rəqəmsal texnologiyaların geniş yayıldığı dövrdə kitabların əhəmiyyətinin daha da artdığını qeyd edib. Onun fikrincə, valideynlərin uşaqlarına kitab oxuması aralarındakı bağı möhkəmləndirir, hərəkətsiz şəkillər isə uşaqların diqqətini detallara yönəltməyə kömək edir.

Rəssam şənbə günü Hastingsdəki White Rock Teatrında keçiriləcək görüşü səbirsizliklə gözlədiyini bildirib. O, bu cür tədbirlərdə uşaqlardan böyük sevgi gördüyünü, lakin valideynlərin onunla tanış olmaqdan daha çox həyəcan keçirdiklərini əlavə edib.