Şotlandiyanın kitab şəhəri Viqtaunda növbəti ədəbiyyat festivalı başlayıb

Paranoyya.com saytı BBC-ə istinadən xəbər verir ki, Şotlandiyanın rəsmi kitab şəhəri hesab olunan Viqtaunda hər il ənənəvi olaraq təşkil edilən ədəbiyyat festivalına start verilib. Oktyabrın 4-nə qədər davam edəcək bu ongünlük mədəniyyət bayramı həm yerli, həm də beynəlxalq qonaqları bir araya gətirməklə yanaşı, Qallovey bölgəsini daha geniş auditoriyaya tanıtmağı hədəfləyir. Festival çərçivəsində keçiriləcək 250-dən çox tədbirdə tanınmış komediya ustası Lüsi Porter, aktyor Sem Hüen, detektiv yazarlar Luiz Velş və Kris Brukmir kimi məşhurlar iştirak edir.

Bu festivalın tarixi 1998-ci ilə təsadüf edir. Həmin vaxt Viqtaun ölkə miqyaslı müsabiqədə digər beş rəqibini – Qeythaus of Flit, Moffat, Dalmellinqton, Danbleyn və Stratheyven şəhərlərini geridə qoyaraq Şotlandiyanın rəsmi kitab şəhəri statusunu qazanıb və ilk festivalını keçirib. O zamandan bəri Şotlandiyanın bu sakit cənub-qərb guşəsi çoxsaylı yazıçıların, məşhurların və siyasətçilərin axınına uğrayıb. Bu axın vaxtilə iri müəssisələrin bağlanması səbəbindən işsizlik problemi ilə üzləşən şəhərə yeni həyat bəxş edib.

Kitab satıcısı və yazıçı Şon Baytell demək olar ki, bütün festivallarda iştirak etdiyini və bu tədbirin şəhərə gətirdiyi müsbət dəyişikliklərin canlı şahidi olduğunu bildirib. Onun sözlərinə görə, festival sadəcə kitab bayramı olmaqdan çıxıb, bölgənin ədəbiyyatını, mədəniyyətini və tarixini nümayiş etdirən, turistləri cəlb edən mühüm bir hadisəyə çevrilib. Bu işdə bütün yerli icma birləşərək qonaqları qarşılamaq və onlara bölgənin zənginliyini göstərmək üçün birgə çalışır.

Festivalın proqram rəhbəri Li Rendall isə qeyd edib ki, bu bölgə həm də özünün istedadlı müasir yazıçıları ilə tanınır. Təşkil olunan proqram regionun yaradıcılıq potensialını, mədəniyyətini və təbiətini diqqət mərkəzinə çəkir. Təşkilatçılar gələn qonaqları ədəbiyyat, film, musiqi, teatr, bələdçi müşayiəti ilə gəzintilər və yeni kəşflərlə dolu maraqlı on gün gözlədiyini vurğulayırlar.