To Kill a Mockingbird əsərinin ilk nəşri Londonun Oxfam mağazasında tapılıb

Paranoyya.com saytı BBC-ə istinadən xəbər verir ki, Xeyriyyə təşkilatının verdiyi məlumata görə, Oxfam-a ianə edilən əşyalar arasında To Kill A Mockingbird romanının nadir ilk nəşri tapılıb.

Harper Lee-nin 1960-cı ilə aid fundamental əsərinin nüsxəsi Qərbi Londonun Portobello Road küçəsindəki xeyriyyə kitab mağazasına verilən Amerika kitabları qutusunda aşkar edilib.

Kitab artıq British Library tərəfindən alınıb və onun milli kolleksiyasına daxil ediləcək.

Nüsxənin ABŞ-dakı ilk nəşr olduğunu müəyyən edən mağaza müdiri Olivia Haysman-Walker kitabın asanlıqla gözdən qaçırıla biləcəyini söyləyib. "İanələr arasında nəzərdən keçiriləsi çoxlu kitab var idi, lakin biz To Kill A Mockingbird əsərini tanıdıq və ona daha yaxından baxmağa dəyəcəyini düşündük."

O əlavə edib: "Həqiqətən xüsusi bir şeyə sahib olduğumuzu olduqca tez anladıq.

Kitabın üz qabığı yaşını göstərirdi və kənarları köhnəlsə də, daxildəki səhifələr gözəl vəziyyətdə idi.

Bu kitabın Oxfam kitab mağazamızdan keçərək British Library-nin milli kolleksiyasına daxil olduğunu düşünmək heyrətamizdir.

Bu, həqiqətən də böyük bir səyahət oldu və İkinci Əl Sentyabrı zamanı mağazalarımızdakı rəflərdə və ianələr arasında gizlənə biləcək xəzinələri xatırladan gözəl bir hadisədir."

İkinci Əl Sentyabrı Oxfam-ın insanları ikinci əl əşyalar almağa təşviq edən illik kampaniyasıdır.

Lee-nin Pulitzer mükafatı qazanmış kitabı ağ dərili qadını zorlamaqda nahaq yerə ittiham olunan qara dərili Tom Robinson-u müdafiə edən vəkil Atticus Finch-in hekayəsindən bəhs edir.

Onun 1934-cü ildə Alabama ştatında cərəyan edən irqi ədalətsizlik və uşaqlıq məsumiyyəti haqqındakı hekayəsi bütün dünyada 40 milyondan çox nüsxə ilə satılıb və 40 dilə tərcümə edilib.

Prezident Azadlıq Medalı ilə təltif edilən amerikalı romançı 2016-cı ildə 89 yaşında vəfat edib.