Uşaqlar ruhi sağlamlıq haqqında kitab çəkdilər: Şimali İrlandiyada yeni layihə

Paranoyya.com saytı BBC-ə istinadən xəbər verir ki, Şimali İrlandiyada ibtidai sinif şagirdləri hiss və həyəcanlarını gənc nəslin ruhi sağlamlığını anlamasına kömək edəcək xüsusi kitaba çeviriblər. "Glencraig Integrated" və "Holywood" ibtidai məktəblərinin 6-cı sinif şagirdlərinin birgə əməyi ilə ərsəyə gələn "The Weather Catcher" (Hava tutan) adlı kitabda duyğuların hər gün dəyişə biləcəyini göstərmək üçün hava şəraiti simvolundan istifadə olunub. Şimali İrlandiya Kitab Həftəsi çərçivəsində təqdim edilən bu nəşr "Action Mental Health" təşkilatının keçirdiyi emalatxanalar sayəsində hazırlanıb. İllüstrasiyaçı Ellan Rankinin rəhbərliyi ilə uşaqlar rənglər, fiqurlar və fakturalar vasitəsilə öz emosiyalarını təsvir etməyi öyrəniblər.

Layihənin balaca iştirakçıları öz hisslərini kağıza köçürərkən müxtəlif detallardan ilham alıblar. 11 yaşlı Raferti kədəri dəniz, yağış və mavi rənglə əlaqələndirərək yazıçı olmaq arzusuna ilk addımı atdığını bildirib. 10 yaşlı Edit isə günəşli havanın insanlara bəxş etdiyi xoşbəxtlikdən bəhs edərək, tay-tuşlarının çəkdiyi fırtına buludu kimi obrazların kitabda yer almasından qürur duyduğunu vurğulayıb. Eyni yaşlı Merrin əsəbi kvadratlar və buludlarla, xoşbəxtliyi isə üçbucaqlarla ifadə etdiyini deyib. Digər şagirdlər — Lizzi və Tobi bu kitabın həmyaşıdlarına öz emosiyalarını sərbəst üzə çıxarmaqda və yaşadıqları hissləri tanımaqda böyük kömək olacağını düşünürlər.

İllüstrasiyaçı Ellan Rankin iki gün ərzində uşaqlarla işlədiyini, onların çəkdiyi eskizləri "Photoshop" proqramında rəqəmsal kollaj halına gətirdiyini bildirib. O, psixi sağlamlıq mövzusunun erkən yaşlardan müzakirə olunmasının cəmiyyətdə bu məsələyə baxışı müsbətə doğru dəyişdiyini qeyd edib. "Action Mental Health" təşkilatının nümayəndəsi Devid Babinqton layihəni yüksək qiymətləndirərək, bu təşəbbüsün gəncləri telefon və planşet ekranlarından uzaqlaşdırıb mütaliə vərdişlərinə yönəldəcəyinə ümid etdiyini dilə gətirib.